Coronavirus (COVID-19) hripui hmaah hian eng nge kan tih tûr?
Tûn hnaia lei pumpuia coronavirus hrileng ṭaidarhna hian, eng kawng emaw chuan min nghawng ṭheuh a. Mi tam takin an lo chhânletna chu lungkhamna leh hlauhna in a ni a. Nimahsela lo chhanlêt dân kawng dang a awm a—chu chu Pathian zawn a ni!
Pathianin hripui leng chuan mipuite tân, “inngaitlâwm a, ṭawngṭai a, ka hmêl zawng tûrin” hun remchâng a pe tih a sawi a (2 Chron. 7:14). “Remna Pathian ngei chuan” (1 Thes. 5:23) vânteah chauh awmreng a duh lo va, keinin Amah chu kan zawn hmuh leh kan tâna remna nih a duh a. Isuan, “In thinlung mangang suh se; Pathian ring ula, kei pawh mi ring rawh u.” (Joh. 14:1) a ti a. Kan mangang tûr a ni lo va. Lungkhamna leh hlauhnaah kan nun a ngai lo. Kawng dang a awm a. “Lalpa chu a hnai e” (Phil. 4:5).
Nimahsela Pathian chu vântea awm daih a nih chuan, engtin nge keimahni hnaiha a awm theih ang? Pathian chuan kan nunna leh kan remna ni tûrin rahbi indawt a kaltlang tih Bible-in min hrilh a. Vân aṭangin a lo chhuk a, kan hnêna chênga, mihring dinhmun a taka tawnhriatna nei thei tûrin kum 2,000 kaltaah khân Isua tih hming puin mihringah a rawn chang a ni. Mihring nun dân tûr dik entawntûr (model) angin he leiah hian Isua chu mihring famkim niin a nung a (Joh. 1:1, 14)—chu chu min hnaisatu sual tûr (poison), thihna hmanga tihkhawloh ve loh nun a ni. Isuan mihring hun kal tawh chanchin a ṭha lama nghawng a neih anga nasain mihring dang tumahin an nei lo. A kalna hmun apiangah Isuan amah zawngtute hnênah chuan remna a thlen ṭhin.
Tichuan sual leh thihna harsatna chu chingfel tûrin, kan Aiawhtu anga kan aiawha thihna tuar tûrin kraws-ah a kal a (Isa. 53:4-6). Kraws-ah chuan sual tûr thahna hlo (antidote)—sual leh thihna lemzotu tûr chatuan nunna chu a chhuah zalen ta a ni. Kan sualte min ngaidam tûrin kan tân a thi a, tichuan Pathian thianghlim leh fel nên inremin kan awm a (Eph. 2:13-14) tihborala awm lovin, Amah kan rinna hmangin chatuan nunna kan dawng thei ta a ni (Joh 3:16). A thihna leh thawhlehna kaltlangin Pathian leh midangte nên inremna kan nei thei a. Tichuan a thawhleh nî tlai lamah, a zirtîrte hnênah a inlâr a, “In hnênah remna awm rawh se,” a ti a, an chhûngah thawlûtin “Thlarau Thianghlim dawng rawh u” a ti a (Joh. 20:21-22).
Tin vawiin hian, “Thu chuan a hnaih che a, i kâ leh i thinlungah a awm …. I kâa Isua chu Lalpa a ni tih i puan chhuah a, Pathianin mitthi zîng ata Ani chu a kai tho tih i thinlunga i rin chuan, chhandamin i awm ang” (Rom 10:8-9). I remna anga Isua dawn dân leh he khawvêl sual, thimna leh thihna laka chhandama i awm dân kawng mawltê chu a hnuaia mi anga ṭawngṭai mai hi a ni:
Lalpa Isu, Nang chu ka ring a che! Lalpa Isu, sual leh thihna aṭangin min chhandam rawh! Lalpa Isu, ka nunna leh rema anga Nang chu dawn che ka duh e! Lalpa Isu, keimaha chêng tûra ka chhûnga i lo luh avângin ka lâwm e!
I ṭawngṭaia Isua i dawn hnu chuan, Amah nêna inpâwlna i neih chhunzawm zêl a pawimawh a. Pathian nêna inpâwlna awmzia chu Amah nêna inbiak reng a ni a. “Engah mah mangang suh u, lâwmthu sawina nêna engkima ṭawngṭaina leh dilna hmangin, in ngennate chu Pathian hnênah hriattîrin awm zâwk rawh se” (Phil. 4:6) Ṭawngtainain a hnênah lo kal la. I ngaihtuahna luahtu chu a hnênah hrilh la, i tân tu nge a nih leh i tâna a tihsak che thilah lâwmthu hrilh ang che. Chutianga i tih chuan, a chhandamna huang chhûngah lûtin, “Pathian 1remna, mihring ngaihtuahna tinrêng khûmtu chuan, in thinlung leh in ngaihtuahnate chu Krista Isuaah chuan a vênghim ang” (ch. 7)
Pathian chu tunge a nih a, Isuaah kan tân eng nge min tihsak hre tûrin, kan website aṭangin lehkhabu ṭhenkhat a thlawna download tûrin kan sawm che a ni.