Kan damchhung zawng hian, kan vaiin dam lohna, kum lama upat deuh deuhna leh a tâwpa thihna tawnhriatna kan nei ṭheuh a. Kan thih chuan engmah kan chhawm ṭhin lo. Mi hlawhtling takte pawhin an thih tawh chuan eng nge an neih? Hetiang hunah zet chuan an hlenchhuah sa leh khawlsate chu engmah lo mai a ni a. Mihring nun hi beisei bo mai a ni kan ti mai thei a, chutichung chuan beisei tûr kan zawng tho si. Beiseina kan nghahna tûr mi pakhat, fiahna tinrêng paltlang tawh, chatuana rintlak mi pakhat a awm a—chu chu Pathian a ni. Engtin nge Pathian chu i beiseina a nih theih dân zawng chhuak rawh le.

Buainaah emaw, harsatna dinhmunah emaw hian, mite chu hrilhhai takin emaw, lo hmachhawn dân tûr hre lovin an awm ṭhin a. Chutiang hunah chuan mi tam tak chu an ṭawngṭai a, mahse eng dîlin nge kan ṭawngṭai a, eng angin nge kan ṭawngṭai? Kawng awlsam leh ṭangkai êm êm chu Bible-a kan hmuh angin Lalpa hming koh a ni (Rom 10:13). Kohna chu ṭawngṭai dân kawng bîk pakhat a ni a; Ngenna)emaw, inbiakna narân emaw ni lovin, nung taka min siamtu leh kan thlarau lam chakna vawngṭhatu thlarau lam thâwk la tûra insawizawina a ni.

Mi tam tak chuan muanna neih theihna kawng awmchhun chu kan pawn lam thil thlengte thunun tumna hmangin a ni tiin an ngaihtuah a. Amaherawhchu, a nihna takah chuan kan chhehvela thil thlengte chuan min thunun zâwk a. Pawn lama thil thlengte chu muanawm tak nise tih kan beisei mai thei a, nimahsela chutih a hnêkin kan nun chu muanna zawng leh vawn ṭhat tuma beihnain a khat a ni. Bible chuan nundân kawng danglam daih a hailang thung a; he nundân hi chuan kan chhehvêlah eng pawh thleng se, muanna sâng zâwk, thûk zâwk, daih rei zâwk leh engkim khûm a thlen a ni.